Песни священнаго писания



ПЕС(НЬ) 1. СЕСТРЫ МОИСИОВЫ И АРОНОВЫ МАРИАМИ. [Исход, 15: 1-19] Иже Мариамь, како видевъ чюдо, славяше Г(оспод)а: собравше лик женъ, сама взя боубенъ, инема же женама повеле две медянеи плесньце взяти, инем же роукама плескати; сама же наполнившися С(вя)т(а)го Д(у)ха, нача вспевати Г(оспод)а, сице гл(лаго)л(я)щи:1. Поимь г(осподе)ви, славно бо прославися: коня и всядникы вверже в море. Ликъ женъ от собраных тоу, отпевахоуть еи, сице г(лаго)л(я)щи, Мариам же пакы:2. Помощникъ и покровитель быс(ть) мне вь сп(асе)ние: се б(ог)ъ мои, и прославлю и, б(ог)ъ о(т)ца моего, и възнесоу и. 3. Г(оспод)ь скроушая брани: г(оспод)ь имя емоу, колесница фараоновы и силоу его вверже в море. 4. Избранныя всядникы тристаты потопи в чермьнемъ мори. 5. Поучиною покры ихъ, погрязоша въ глоубине яко камень. 6. Десница твоя, г(оспод)и, пославися вь крепости, десная ти роука, г(оспод)и, скроуши врагы, и множьствомь славы твоея стерлъ еси соупостаты.7. Посла гневъ свои, поясть я яко стеблие, и д(у)хомь ярости твоея растоупися вода.8. Огоустеша яко стена воды, огоустеша и волны посреди моря. 9. Реч(е) врагъ: гнавъ постигноу, разделю користь, насыщю д(у)ши мою, оутноу мечемь моимъ, оудолееть роука моя. 10. Послалъ еси д(у)хъ свои, покры ихъ море: погрязоша яко олово в воде зелене.11. Кто под(о)бенъ тобе въ б(о)зехъ г(оспод)и; кто под(о)бенъ тобе, прославленъ вь с(вя)т(е)хъ, дивенъ вь славах творя чюдеса; 12. Простреть десницю свою, пожреть ихъ земля, наставилъ еси правдою твоею люд(и) твоя сия, яже избави,13. Оутешилъ еси крепостию своею вь обитель с(вя)тоу твою. слышаша языци, и прогневашася, болезни прияша живоущая вь филистеме. 14. Тогда потщашас(я) вл(а)д(ы)кы едемьскыя, и князи моавитьстии, приятъ ихъ трепетъ, растаяшася вси живоущеи в ханаане. 15. Нападеть на ня страх и трепетъ, величиемь мышца твоея да окаменятся. 16. Дондеже проидоша люд(и)е твои г(оспод)и, дондеже проидоша люд(и)е твои сии, ихже стяжа. 17. Въвед насади ихъ в гороу достояния твоего: в готовое жилище твое, еже сдела г(оспод)и, с(вя)т(ы)ню, г(оспод)и, еже оуготовасте роуце твои. 18. Г(оспод)ь ц(а)р(с)твоуеть в векы, и на векъ, и еще, яко вниде конь фараоновъ с колесницами и всядникы в море. 19. И наведе на ня г(оспод)ь водоу морьскоую, с(ы)н(о)ве же (и)зр(аи)л(е)ви проидоша посоухоу посреде моря.

ПЕС(НЬ) 2. ПР(О)Р(О)КА МОИСЕЯ.

Реч(е) бо Моисии Ис(усо)ви, с(ы)ноу Навгиноу, г(лаго)ля: ты введеши с(ы)ны изр(аи)левы в землю, еюже Г(оспод)ь клятся имъ. И заповедаи левгитомъ: сия книгы вземше, положите я вь стране ковчега: завета Г(оспод)а Б(ог)а нашего.И боудоуть тоу въ сведение тобе, яко азъ сведе разгневания моя, и выю твою жестокоую. И еще: ми, бо живоусоущю с вами дн(е)сь, разъгневающи есте Б(ог)а, а не како по см(е)рти моеи. Ныне же призовите и ко мне: стареишины племении ваших, и старца ваша, и соуд(и)я ваша, да гл(агол)ю в оуши их вся словеса си.Извещю имъ небомъ и землею: вемъ бо, яко по скончании моемъ беззаконните исклонитеся с поути, иже азъ заповедах вамъ. Срящет вы зло в последняя дни, яко зло створисте пред Г(оспо)демь, разгневасте и в делех роукоу вашею. Г(лаго)ла же Моисии вся г(лаго)лы песни сея, в воуши всемоу сонмоу из(раи)л(е)воу сице:

ПЕСНЬ ВТОРАЯ. [Второзаконие, 32: 1-43] 1. Вонми н(е)бо, и вьзг(ла)г(о)лю, и да сьлышить земля [глаголы] оустъ моих. 2. Да чаеть яко дождь провещение мое, и снидоуть яко роса г(лаго)ли мои.3. Яко тоуча на троскотъ, и яко инии на сено, яко имя г(оспод)не призвах, дадите величие б(ог)оу нашемоу. 4. Б(ог)ъ, истинна дела его, и вси поутье его соуд.5. Б(ог)ъ веренъ, и нес(ть) неправды в немь, праведенъ и пр(е)п(о)д(о)б(е)нъ г(оспод)ь. 6. Согрешиша, не того чада порочна: роде строптивыи и развращеныи, сия г(осподе)ви вьзъдаете;7. Сие люд(и)е боуи и нем(у)дри. не сам ли се твои о(те)ць стяжа тя, и створи тя, и созда тя; 8. Помянете дни вечныя, разоумеите лета рода родовъ. 9. Вьпроси о(т)ца твоего, и вьзвестит ти, старца твоя, и р(е)коуть. 10. Егда разделяаше вышнии языкы, якоже рассея с(ы)ны адамовы.11. Положи пределы языкомъ по числоу агг(е)лъ б(о)жиихъ.12. И быс(ть) часть г(оспод)ня, люд(и)е его, ияковъ, яже достоянья его из(раи)ль.13. Оудовли его в поустыни, и в жажю зноя в безводне. 14. Обыде его, и наказа его, и схрани его яко зеницю ока. 15. Яко орелъ покрыти гнездо свое, и на пьтенца своя вжеле.16. Простеръ криле свои, приятъ я, и взятъ и на рамоу своею. 17. Г(оспод)ь единъ вожаше я, и не бе с ними б(ог)ъ чюжь. 18. Вьзведе я на силоу земли, и насыти ихъ житъ селных. 19. Ссаша мед ис камене, и елеи от тверда камене.

20. Масло кравье, и млеко овчее с тоукомъ агньчемь и овнимъ, с(ы)н(о)въ юнчих и козлихъ, с тоукомъ пшеничномъ, и кровь гроздовоу пияхоу вино. 21. И яде ияковъ и насытися, и отвержеся вьзлюбленыи: 22. И оуты, оутолъсте, рашшире: и остави б(ог)а створшаго и, и отстоупи от б(ог)а сп(а)са своего. 23. Разъгневаша мя от [ч]оуждих, в мерзостехъ своихъ огорчиша мя. 24. Пожроша бесомь, а не б(ог)оу, б(о)гомъ ихже [не] видеша: нови секрат приидоша, ихже не ведяша о(т)ци ихъ. 25. Б(ог)а рожшаго тя остави, и забы б(ог)а питающаго тя. 26. И виде б(ог)ъ, и вьзреввнова, и раздражися за гневъ с(ы)н(о)въ ихъ и дьщерии. 27. И реч(е): отвращю лице мое от них, и покажю, что боудеть имъ напоследокъ: 28. Яко род развращенъ ес(ть), с(ы)н(о)ве ихже нес(ть) веры в них. 29. Ти разгневаша мя не о б(о)зе, прогневаша мя во идолехъ своих: 30. И азъ раздражю ихъ не о языцех, и о языцехъ не же разоумне прогневаю ихъ. 31. Яко огнь разгорится от ярости моея, ражжется до ада преисподняго: 32. И поясть землю и жита ея, попалить основания горамъ. 33. Збероу на тя злая, и стрелы моя скончаю на них. 34. Таяще гладомъ, и яденьемь птиць, и горбъ неисцеленъ: зоубы звереи послю в ня, сь яростью пресмыкающимся по земли. 35. Вне оудоу бещадить ихъ мечь, и от храмъ ихъ страх:36. Оуноша съ д(е)вою, ссоущемъ съ отрокомъ и старцемь. 37. Рехъ: рассею их, оуставлю же от ч(е)л(о)в(е)къ память ихъ.38. За гневъ врагъ, яко да не долголетьствоують, и да не налягоуть на ня соупостати.39. Да не рекоут: роука наша высока, а не г(оспод)ь створи сих всехъ. 40. Яко язык погоубль с[о]ветъ ес(ть), и нес(ть) в них хоудожьства.41. Не смыслиша разоумети,сия вся да приимоут в грядоущее время. 42. Како поженеть единъ тысящю, и два двигнета тмы, аще не б(ог)ъ отдас(ть) ихъ, и г(оспод)ь предас(ть) ихъ; 43. Не соуть бо б(о)зи ихъ, яко б(ог)ъ нашь: врази же наши неразоумливи. 44. От виноград[овъ] бо содомьскых виноград ихъ, и лоза ихъ от гоморы: гроздъ ихъ, грозъ желчи, гроздъ горести ихъ. 45. И ярость змиевъ, вино их, и ярост(ь) аспид(а) неисцелна. 46. Не се ли си вся собрашася оу мене, и запечатлешас(я) вь с[о]кровищих моихъ; 47. Вь д(е)нь отмщения вьздамъ, во время егда соблазнится нога ихъ.48. Яко близь д(е)нь погибели ихъ, и предсташа готовая вам. 49. Яко соудить г(оспод)ь людемъ своимъ, и о рабехъ своихъ оумолится.50. Виде бо ихъ ослабевша, и в пленъ ведомы, и скорбьны. 51. И реч(е) г(оспод)ь: где соут(ь) б(о)зи ихъ, в нихже оуповаша на ня; ихже тоукъ жертвъ ихъ ядясте, и ясте вино требъ ихъ; 52. Да вьскр(ес)ноуть и помогоут вамъ, и боудоуть вамъ покровители. 53. Видите видите, яко азъ есмь, и нес(ть) б(ог)ъ разве мене.54. Азъ оубию, и жити створю: поражю, и азъ и исцелю, и нес(ть), иже измет от роукоу моею.

55. Яко вздвигноу на н(е)бо роукоу мою, и кленоуся десницею моею, и р(е)коу: живоу азъ в век. 56. Яко поострю яко молнию меч мои, и прииметь соуд роука моя:57. И вьздам мес(ть) врагомъ, и ненавидящим мя вьздамь. 58. Оупою стрелы моя от крове, и ороужье мое снес(ть) мяса:59. От крове язвеных и пленения, от главы князь язычьскых. 60. Вьзвеселитеся н(е)б(е)са коупно с нимь, и да поклонятся емоу вси агг(е)ли б(о)жии:61. Веселитеся языци с людми его, и да оукрепят и вси с(ы)н(о)ве б(о)жии. 62. Яко кров(ь) с(ы)н(о)въ своих мьщаеть, и отмьстит: и вьздас(ть) месть врагомъ, и ненавидящимъ его вьздас(ть).63. И очистит г(оспод)ь землю люд(и)и своихъ.

ПЕС(НЬ) 3. АННИНА, М(А)Т(Е)РИ САМОИЛА ПР(О)Р(О)КА. [Первая Книга царств, 1: смотри выборочно]

Ч(е)л(о)в(е)къ бе Ексарь-Мафема Соуфьска града, от горы Ефремля. Имя емоу Елканъ, с(ы)нъ Ермеинъ, с(ы)на Ильина, с(ы)на Фокеля, от племене Ефремля. И оу сего Елкана беста две жене: имя единои Анна, имя дроугои Фенана. И беша оу Фенаны дети, а оу Анны не бе чад. Отдели же Елкана жене своеи Фенане часть имения своего, и с(ы)номъ ея, а Анне не дас(ть) части, яко не бе еи чада.Анна же оубо дряхла быс(ть), и печаловаше и плакашеся, иже не бе еи чад.Того ради сетовашес(я) и реч(е) к неи Елкана: что ти есть яко плачеши, не азъ ли добрее тобе, паче девяти чад, иже от Фенаны; И вьста Анна, и испросися оу моужа своего, и иде в Силомъ, идеже бе Иллии жрец, седяше при дверех храма Г(оспод)ня. И нача Анна молитися Г(осподе)ви в таине с(е)рдца своего. И тригоубнымь именем вь Тр(ои)ци естьество обави, реч(е) бо: аданаи Г(оспод)и, елвое Саваофъ, призри на смирение мое, рабы своея, и даи же ми, рабе своеи, семя моужескъ полъ, и дамъ его пред тобою в даръ, до дне см(е)рти ег(о). И сице еи г(лаго)лащи вь с(е)рдци своемь д(у)х(о)мь скроушенымъ от многыя печали, и любви, яже къ Б(ог)оу. Языкъ же ея не г(лаго)лаше, и глас ея не слышашеся, но токмо оуста ея двизахоуся. И глас слезъ ея троубы взиде пред Б(ог)ъ. Видев же ю Илли жрец в печали соущю оу храма Г(оспод)ня моляшюся. И реч(е) к неи: Б(ог)ъ изр(аи)левъ даи же ти всяко прошение, иди с миромь в домь свои. И посемь зачатъ, и роди с(ы)нъ, и нареч(е) имя емоу Самоилъ. И взииде Елкана, о(те)ць его, в Силомъ: пожрети жертвоу Б(ого)ви. Егда же оубо Анна отдои отроча, и доста родителя его с нимъ в Силомъ, вземша жертвоу Г(осподе)ви. Анна же принесе отроча ко Илли, и реч(е) емоу: дас(ть) ми Г(оспод)ь прошение мое, и азъ даю его Г(осподе)ви вся дни живота его, на помазание пред храмомъ Г(оспод)ним. Сама же Анна сподобльшися пр(о)рочественаго дара, начатъ пес(нь) сию вспевати Г(осподе)ви:

ПЕСНЬ ТРЕТЬЯ [Первая Книга царств, 2: 1-10]

1. Оутвердися с(е)рдце мое о г(оспод)и, възнеся рогъ мои о б(о)зе моемъ, рашширишася оуста моя на врагы моя, вьзвеселихся о с(пасе)ньи твоемь. 2. Яко нес(ть) с(вя)тъ яко г(оспод)ь, и нес(ть) праведенъ яко б(ог)ъ нашь, и нес(ть) с(вя)тъ разве тобе. 3. Не хвалитеся и не г(лаго)лите высокая в гордыни, ни да изыдеть велеречие из оустъ ваших: 4. Яко б(ог)ъ разоумомъ г(оспод)ь, и б(ог)ъ оуготовая начинание свое.5. Лоукъ силных изнеможе, и немощнии препоясашася силою. 6. Исполнь хлеба лишишася, и алчющеи преидоуть землю. 7. Яко неплоды роди седмь, и многа в чадехъ изнеможе. 8. Г(оспод)ь м(е)ртвить и живит, низводить въ адъ, и възводит. 9. Г(оспод)ь оубожить и богатить, смиряеть и высить: вьздвизаеть от земля оубога, и от гноища оустробляеть нища: 10. Посадити его с могоутми людскыми, и пр(ес)т(о)лъ славы наследоуя емоу. 11. Дая м(о)л(и)твоу молящемоуся, и б(лагос)л(о)вилъ еси лета праведнаго.12. Яко не оукрепляется силенъ моужь крепостию своею, г(оспод)ь немощна створить соупостата емоу, г(оспод)ь с(вя)тъ.13. Да не хвалится пр(е)м(у)дрыи прем(у)др(ос)тью своею, и да не хвалится богатыи богатъствомъ своимь, и да не хвалится силныи силою своею. 14. Но о семь да хвалится хваляися, еже разоумети и знати г(оспод)а, и творити соуд и правдоу посреди земля. 15. Г(оспод)ь взыде на н(е)б(е)са и возгреме, и тъ соудить концемь земли, праведенъ сыи.16. И дас(ть) крепость ц(а)р(е)мъ нашимъ, и вьзнесеть рогъ х(рист)а своего.

ПЕС(НЬ) 4. АВВАКОУМА ПР(О)Р(О)КА. [Книга пророка Аввакума, 3: 1-19]

1. Г(оспод)и, оуслышах слоух твои, и оубояхся: г(оспод)и, разоумех дела твоя, и дивихся. 2. Посреде двою животоу познанъ боудеши: егда приближатся лета, познанъ боудеши, егда приидеть время, явишися. егда смоутится д(у)ша моя вь гневе, ми)л(о)сти помянеши. 3. Б(ог)ъ от оуга приидет, и с(вя)тыи из горы пресенныя часты. 4. Покры н(е)б(е)са добродетель его, и хвалы его исполнь земля.

5. И сияние его, яко светъ боудет, рози в роукоу его, и положи любовь твердоу крепости своея. 6. Пред лицемь его идеть слово, и изыидеть на поле за пятоу его. 7. Ста, и подвижася земля: призре, и растаяшася языци. 8. Скроушишася горы ноужею, и истаяша холми вечнии, шествия их вечная: за троуд видеша села ефиопьская, оубоятся и крови земля мадиамьскы. 9. Еда в реках прогневаешися г(оспод)и; еда в реках ярость твоя; ли вь мори оустремление твое; яко всядеши на коня своя, и яжденье твое сп(асе)ние. 10. Напрязая напряжеши лоукъ свои на скыпетры, г(лаго)леть г(оспод)ь.11. Реками рассядется земля, оузрять тя, и разболятся люд(и)е.12. Растачая воды нашествия: дас(ть) бездна глас свои, и высота привидения своя: вьздвижеся с(о)лнце, и лоуна ста в чиноу своемь.13. Вь св(е)те молния твоя поидоут, въ блистани молния ороужья твоего. 14. Прещеньемь оумалиши землю, яростью низложиши языкы. 15. Изыде вь сп(асе)нье люд(е)мь своимъ, сп(а)сти христы своя пришелъ еси,16. Вложил еси в главоу безаконных см(е)рть, въздвиглъ еси оузы даже до выя в конець. 17. Ссеклъ еси оужасомъ главы силных, стрясоутс(я) в них, разверзоуть оузды своя, яко ядыи нищии таи. 18. И навелъ еси на море коня своя, смоущающая воды многы. 19. Схранихся, и оубояся с(е)рдце мое, от глас м(о)л(и)твы оустенъ моихъ.20. Вьниде трепетъ в кости моя, и во мне смоутися крепость моя.21. Почию вь д(е)нь печали моея, да взыдоу в люди пришельствия моего. 22. Зане смокы плода не створить, и не боудеть рода в виноградех.23. Солжеть дело маслично, и поля не створять яди.24. Оскоудеша овца от пища, и не боудеть воловъ при яслех. 25. Аз же о г(оспод)и вьзвеселюся, вьзрадоуюся о б(о)зе сп(а)се моемъ. 26. Г(оспод)ь б(ог)ъ мои сила моя, и оучинить нози мои на свершен(и)е.27. И на высокыя наводить мя, да побежю въ пес(не)хъ его.

ПЕС(НЬ) 5. М(О)Л(И)ТВА ИСАИЯ ПР(О)Р(О)КА. [Книга пророка Исаии, 26: 9-20]

1. От нощи оутренюеть д(у)хъ мои к тобе б(о)зе, зане свет повеления твоя по земли. 2. Правде наоучитеся живоущеи на земли. 3. Преста бо неч[ес]тивыи, не наоучится правде, на земли истины не створить. да возмется неч[ес]тивыи, да не видить славы г(оспод)ня.

4. Г(оспод)и, высокая твоя мышца, и не видеши. разоумевше же постыдятся. 5. Зависть приимоуть люд(и) ненаказаны, и ныне огнь соупостаты поясть. 6. Г(оспод)и б(ог)ъ нашь, миръ даи же намъ, вся бо вьздалъ еси намъ. 7. Г(оспод)и б(ож)е нашь, стяжи ны: г(оспод)и, разве тобе иного не вемы, имя твое имяноуемъ. 8. М(е)ртвии живота не имоуть видети, ни врачеве не могоуть вьсъкресити. 9. Сего рад(и) наведъ и погоубилъ еси, и взять всякъ моужескъ пол ихъ. 10. Приложи имъ зла, г(оспод)и, приложи зла славнымъ земля. 11. Г(оспод)и, в печали помяноухом тя, и в печали мале наказание твое намъ. 12. И яко болящия приближается родити, и в болезни своеи вопияше, тако быхомъ вьзлюбленомоу твоемоу. 13. Страха рад(и) твоего г(оспод)и вь чреве прияхомъ, и поболехомъ, и родихомъ д(у)хъ сп(асе)ния, егоже створихомъ на земли. не падемся, но падоутся живоущеи на земли. 14. И вьскр(ес)ноуть м(е)ртвии, и вьстаноуть соущии вь гробех, и вьзвеселятся иже соуть на земли. 15. Роса бо, яже от тобе, исцеление емъ есть, земля же неч[ес]тивых падет. 16. Стоупаите люд(и)е мои, внидете вь клеть свою, оукрыитеся, в мале елико, елико, дондеже мимо идет гневъ г(осподе)нь.

ПЕС(НЬ) 6. МОЛ(ИТВА) ИОНЫ ПР(О)Р(ОКА). [Книга пророка Ионы, 2: 3-10]

1. Въз[о]пих в печали моеи к г(оспод)оу б(ог)оу моемоу, и оуслыша мя. 2. Ис чрева адова вопль мои, оуслышалъ еси глас мои. отверже мя в глоубины с(е)рдца морьскаго, и рекы обыидоша мя. 3. Вся высоты твоя, и волны твоя по мне преидоша. 4. И азъ рех: отриноухся от очию твоею, [еда] приложю призрети ми кь ц(е)ркви с(вя)теи твоеи; 5. Возлияса вода до д(у)ша моя, бездна обыде мя последняя. 6. Понреть глава моя в пропади горскыя, снидох вь землю, еяже верея и заклепи вечнии. 7. И да възыдет из ыстления животъ мои к тобе, г(оспод)и б(ож)е мои. 8. Егда и скончавашес(я) от мене д(у)ша моя, г(оспод)а помяноух. 9. Да приидеть к тобе м(о)л(и)тва моя къ ц(е)ркви с(вя)теи твоеи. 10. Хранящи соуетная и лжю, м(и)л(ос)ть свою оставиша.11. Аз же съ гл(асо)мь хвален(и)я и исповедания пожроу тобе: елика обещахся, въздамъ тобе на сп(асе)нье мое г(осподе)ви.

ПЕС(НЬ) 7. М(О)Л(И)ТВА ЗАХАРЬИНА, ОТ КНИГЪ ДАНИЛА ПР(О)Р(О)КА. [Книга пророка Даниила, 3: 26-56]

1. Б(лагос)л(о)в(е)нъ еси г(оспод)и б(ож)е о(те)ць наших, и хвално и прославено имя твое в векы. 2. Яко праведенъ еси о всех, ихже створилъ еси намъ, и вся делаа твоя истинна, и прави поутье твои, и вси соуди твои истиннии: 3. Соудбы истинны створилъ еси, по вся яже наведе на ны, и на град с(вя)тыи о(те)ць наших иер(уса)л(и)мъ: яко истинною и соудомъ наведе сия вся на ны грехъ ради наших. 4. Яко согрешихомъ, и безаконовахомъ отстоупити от тобе, и прегрешихомъ о всемь. 5. И заповеди твоя не послоушахомъ, ни с(о)блюдохомъ, ни с(о)творихомъ, якоже заповеда намъ, да бл(а)го намъ боудеть. 6. И вся елика створилъ еси намъ, и вся елика наведе на ны, воистиноу соуд створи. 7. И предалъ еси нас в роуце врагъ безаконенъ, мерзокъ престоупникъ, и ц(а)рю неправедноу, и лоукавнешю пач(е) всея земля. 8. И ныне нес(ть) намъ отверсти оустъ, стоуд и поношение быхомъ рабомъ твоимъ, чтоущиим тя. 9. Не предаже нас до конца имени твоего рад(и), и не разори завет твои. 10. И не остави м(и)л(о)сть твою от нас, авраама ради вьзлюбленаго от тобе, и за исака раба твоего и изр(аи)ля с(вя)т(а)го твоего: 11. Имже гла(голалъ) оумножити семя их яко звезды н(е)б(ес)ныя, и яко песокъ вь скраи моря. 12. Яко вл(а)д(ы)ко оумалихомся паче всех язык, несмы смирени по всеи земли дн(е)сь грехъ рад(и) наших. 13. И нес(ть) во время се князя, и пр(о)р(о)ка, и вож[д]а, ни всесъжжения, ни жертвы, ни приношения, ни кадила, ни места, идеж(е) пожрети пред тобою, и обрести м(и)л(о)сть: но д(у)шею съкроушеною, и д(у)х(о)мь смиреномъ да прияти боудемъ. 14. Яко во всесъжении овенъ и оунець, яко во тмах агнець тоученъ, тако да боудеть жертва наша пред тобою дн(е)сь, и скончаемъ по тобе: яко нес(ть) стоуда оуповающимъ на тя. 15. И ныне вслед тобе грядемъ всемъ с(е)рдцемъ, и боимся тобе, и ищемъ лица твоего:16. Не посрами нас, но створи с нами по кротости твоеи, и по множьствоу м(и)л(ос)ти твоея. 17. И изми ны по чюдесемь твоимъ, и даже славоу имени твоемоу г(оспод)и. 18. И посрамятся вси являющеи рабомъ твоимъ злая, и постыдятся от всякыя силы, и крепость ихъ скроушится, 19. И познають, яко ты еси б(ог)ъ единъ, и славенъ по всеи вселенеи.

20. И не престаша ввергъше ихъ слоугы ц(а)ревы, жгоуще пещь нафтою, и смолою, изгребми и лозьемъ.21. И разливаашеся пламень над пещью, на четыредесять девять лактеи.22. И объиде и пожже, яже обрете о пещи халдеистеи. 23. Ангелъ же г(осподе)нь сниде скоупно съ азарьиною чад(о)ю в пещ(ь): 24. И отятъ пламы огныи от пещи, и створи посреде пещи, яко д(у)хъ хладенъ шюмящь: и не прикосноуся ихъ отиноуд огнь, ни оскорби, ни стоужи имъ.25. Тогда ти трие яко единеми оусты пояхоу и б(лагос)л(о)вяхоу, и славяхоу б(ог)а в пещи, г(лаго)л(а)ще:26. Б(лагос)л(о)в(е)нъ еси г(оспод)и б(ож)е о(те)ць наших, и препетъ и превозносимъ в векы.27. Б(лагос)л(о)в(е)но имя славы твоея с(вя)тое, препетое и превозносимо в векы. 28. Б(лагос)л(о)венъ еси вь ц(е)ркви с(вя)тыя славы твоея, и препетъ, и превозн[осимъ в векы]. 29. Б(лагос)л(о)в(е)нъ еси видяи бездны, седяи на хероувиме, и препетъ и превозносимъ в векы. 30. Б(лагос)л(о)в(е)нъ еси на пр(ес)т(о)ле славы ц(а)рствия твоего, и препетъ и превозноси[мъ в векы]. 31. Б(лагос)л(о)в(е)нъ еси на тверди н(е)б(ес)неи, и препетъ и превоз[носимъ в векы].

ПЕС(НЬ) 8. ПЕНИЕ, СТ(И)ХЪ, ТРИЕХЪ ОТРОК. [Книга пророка Даниила, 3: 57-88]

1. Б(лагос)л(о)в(и)те вся дела г(оспод)ня г(оспод)а, поите и превозносите его в векы. 2. Б(лагос)л(о)в(и)те анг(е)ли г(оспод)ни, н(е)б(е)са г(оспод)ня г(оспод)а, поите и превозносит[е его в веки]. 3. Б(лагос)л(о)в(и)те воды вся, яже превыше н(е)б(е)съ, вся силы г(оспод)ня г(оспод)а, поите и п[ревозносите его в веки]. 4. Б(лагос)л(о)в(и)те с(о)лнце и м(еся)ць, звезды неб(ес)ныя г(оспод)а, поите и превоз[носите его в векы]. 5. Б(лагос)л(о)в(и)те всякъ дождь и роса, и вси д(у)си (оспод)а, поите и пр[евозносите его в векы]. 6. Б(лагос)л(о)в(и)те огнь и знои, зима и варъ г(оспод)а, поите и прев[озносите его в векы].

7. Б(лагос)л(о)в(и)те росы и инье, леди и мразъ г(оспод)а, поите и пр[евозносите его в векы]. 8. Б(лагос)л(о)в(и)те сланы и снези, ноща и д(е)нье г(оспод)а, поите и пр[евозносите его в векы]. 9. Б(лагос)л(о)в(и)те свет и тма, молния [и] облаци г(оспод)а, поите и пр[евозносите его в векы].10. Б(лагос)л(о)в(и)те земля , горы и холми, вся прозебающая в них г(оспод)а, поит[е и превозностите его в векы]. 11. Б(лагос)л(о)в(и)те моря, рекы, и кити, источници, и вся движащаяся в водах г(оспод)а, поите и прев[озносите его в векы].12. Б(лагос)л(о)в(и)те вся птица н(е)б(е)сныя, зверие и вси скоти г(оспод)а, поит[е и превозносите его в векы]. 13. Б(лагос)л(о)в(и)те с(ы)н(о)ве ч(е)л(о)в(е)ч(с)тии, и б(лагос)л(о)ви изр(аи)ль г(оспод)а, поите и [превозносите его в векы]. 14. Б(лагос)л(о)в(и)те с(вя)щенници г(оспод)ни, раби г(оспод)ни г(оспод)а, поите и п[ревозносите его в векы]. 15. Б(лагос)л(о)в(и)те д(у)си и д(у)ша праведных, пр(е)п(о)д(о)бнии и смирени с(е)рдц(е)мь г(оспод)а, п[оите и превозносите его в векы]. 16. Б(лагос)л(о)в(и)те анания, азария, мисаилъ г(оспод)а, поит[е и превозносите его в векы]. 17. Б(лагос)л(о)в(и)те ап(осто)ли, пр(о)р(о)ци и м(у)ч(е)н(и)ци г(оспод)а, поите [и превозносите его в векы]. 18. Б(лагос)л(о)вимъ о(т)ца, и с(ы)на, и с(свя)т(а)го д(у)ха, г(оспод)а, поимъ и превозносимь ныне и прис(но), и в векы век[овъ]. 19. Хвалимъ, б(лагос)л(о)вимъ, кланяемся г(осподе)ви, поюще и превозносяще в в[ся веки].

ПЕС(НЬ) 9. Б(ОГОРОДИ)ЦИ, ЕЖЕ ОТ ЛОК(И) С(ВЯ)Т(А)Г(О) ЕОУА(Н)Г(ЕЛИ)А. [Евангелие от Луки, 1, 46-55]

1. Величить д(у)ша моя г(оспод)а, и възрадовася д(у)хъ мои о б(о)зе сп(а)се моемъ. 2. Яко призре на смирение рабы своея, се бо отныне блажат мя вси роди. 3. Яко створи мне величие силныи, и с(вя)то имя его, и м(и)л(ос)ть его в род и род боящимся его. 4. Створи державоу мышцею своею, расточи гордыя мысли с(е)рдца ихъ. 5. Низложи силныя сь пр(ес)т(о)лъ, и вьзнесе смиреныя, алчющая исполни бл(а)гъ, и богатящаяся отпоусти тща. 6. Вьсприятъ изр(аи)ль отрока своего, помяноути м(и)л(ос)ти, якоже г(лаго)ла къ о(т)ц(е)мь нашимь, авраамоу и семяни его до века.

ПЕС(НЬ) ПР(О)Р(О)КА ЗАХАРЬИ, О(Т)ЦА ПР(Е)ДТ(Е)ЧЕВА [Евангелие от луки, 1: 68-79]

1. Б(лагос)л(о)в(е)нъ г(оспод)ь б(ог)ъ изр(аи)л(е)въ, яко посети и створи избавление люд(е)мъ своимъ: 2. И вьздвиже рог сп(асе)ния намъ, в домоу д(а)в(и)да отрока своего. 3. Якоже г(лаго)ла оусты с(вя)т(ы)х, иже от века пр(о)р(о)къ его. 4. Сп(асе)ние от врагъ наших, и из роукъ всех ненавидящих нас. 5. Створити милость со о(т)ци нашими, и помяноути заветъ с(вя)тъи свои. 6. И клятвоу, еюже клятся къ аврамоу о(т)цю нашемоу, дати намъ бе[з] страха, из роукы врагъ наших избавльшеся: 7. Слоужити емоу преподобиемъ и правдою пред нимь, вся дни живота нашего. 8. И ты отроча, пр(о)р(о)к вышняго наречешися: предидеши бо пред лицемь г(оспод)нимъ, оуготовати поути его. 9. Дати разоумъ сп(асе)ния люд(е)мъ его, въ оставление грехъ ихъ, за милосердие м(и)л(ос)ти б(ог)а нашего.10. Вь нихже посети нас вьстокъ свыше, просветити седящая во тме и сени см(е)р(т)неи.11. Направи ногы наша на поуть миренъ.

В лет(о) 6905, списана быс(ть) книга си Давыда ц(а)ря, повеленьемь смиренаг(о) вл(а)д(ы)кы Михаила, роукою грешнаго раба Спиридонья протодиякона.А писана в граде в Киеве.






map